2021.08 筆記合集

藝術家 Artist :
Sam Gilliam

地點 Venue :
Pace Gallery, Hong Kong

Sam Gilliam 的 Unknown Pleasures

睇完 Sam Gilliam 呢批新作，覺得咁啱就有「無用石」想講個種摸石嘅感覺。畫家用濕左嘅 canvas 創造起伏，有時係谷起，有時係加多層 canvas layer，再係上面隨機咁加顏料同粒粒，第一眼睇到就已經有一種好強嘅 geographical 感覺，好似鳥瞰一個山景、田、或者沙漠咁。成張canvas好似地表咁，記錄左畫家「製造」呢個「地景」嘅痕跡，究竟係由咩角度咩方向令呢一堆隨機放係畫布上嘅元素如斯咁呈現都一一睇得出，呢一堆玩弄畫布嘅操作亦都獨特地、意外地製造唔同嘅空間同生命，特別深刻喺 Butterflies-Butterflies (2021) 上有個位 cavas 曲起左向上，啱啱好可以兜住啲粒粒，好似個巢咁。而當你再貼近畫布到睇，每一個細節都有佢隨機、「天然」、而所以非常精彩嘅地方，稍移角度亦會睇到另一片風景，另一種美。

不得了。睇完好想訓係佢啲畫到係咁睇同摸啊！

藝術家 Artist :
江上越 Etsu Egami

地點 Venue :
Whitestone Gallery, Hong Kong

日期 Date :
2021.08.13

對上一次睇江上越係喺大館《UNSCHEDULE》，淨係記低左佢嘅筆跡，但今次因為最近思考左啲時間嘅問題，所以又有更深嘅體會。今次 whitestone 以一期一會為題展出嘅江上越作品，用色同 pattern 都係較我以前睇過嘅暗沉同低調，而加上佢一向有速度同透白嘅筆跡，令呢批係疫情期間完成嘅作品有一陣好重嘅失落感。至於佢咁樣嘅畫風係點得黎架呢？展覽其中引用左 Iain Robertson (Head of Art Business Studies, Sotheby’s Institute of Art) 嘅詮釋：

// 一個強調短暫、快速與無常的時代產生的混亂與喧囂 //

一期一會，並唔係講一生人只會遇到一個人一次，而係講每一次見每一個人，都係唔同而獨特嘅每一次、每一個人，所以一生人只會遇到「呢個人」一次。處於現代就更甚，快速、異化同陌生嘅生活令我地更難去捕捉一個人嘅全部。要用力去捉緊一個人嘅所有輪廓同內容，係幾咁困難，我地係幾咁無力而徒勞去嘗試填滿江上越畫作中，因為速度而流失顏料、而遺留落黎嘅空白，即使我地好似江上咁用鉛筆起好稿，做好準備，亦只能夠係影像邊垂留下輪廓，留下如千葉成夫先生（日本美術評論家）所講嘅 essence but without essence︰

// Egami Etsu’s new work is about “essence, and/ or abstraction”. On the other hand, the essence of the event is taken out. //

導演 Director :
庵野秀明

年份 Year :
2021

日期 Date :
2021.08.18

// 人類有時候什麼都不能改變 // — 新世紀福音戰士新劇場版:||

本身冇打算寫 eva ，因為藝術上冇咩特別野諗到，但今日睇到篇影評，無明火起，決定 drop 下 notes。

篇野講到無論個故事重製幾多次，當初嘅激情已經死去已成事實，不會改變。但人類補完計劃吸引人嘅從來都唔係激情，而係因為人類補完係人類永問嘅問題，係每個人一生都要面對嘅課題。面對人與人之間嘅 AT力場，今次《:||》為人類提供嘅案係希望之槍同絕望之槍之外嘅知慧之槍 — 蓋烏斯之槍，佢好直白咁講到，Wille 相信人類知識最後可以超越神，所以我地唔需要人類補完，唔再需要 Evangelion。但事實係呢幾日關於阿富汗嘅新聞再次話比我地知人類係幾咁醜陋，文明係幾咁無力。我（呢一刻）唔相信知識可以令人成為神，亦唔相信成長、或者任何野可以解決人類補完問題，所以亦唔認為任何一版嘅 eva 結局為問題提出正確答案，因為每個人只可能透過實踐同傷害去為自己補完，而呢個亦係舊 TV 版結局 — 以大量虛無獨白同剪接提出問題 — 比較吸引、被稱神作嘅地方。

題外話，對於《:||》黎講，我最唔滿意嘅其實係バカシンジ又再次揼低左明日香，根本沒有負責任！

藝術家 Artist :
黃淑賢 Elaine Wong

地點 Venue :
/

20C - Elaine’s? Home?

乜野係屋企？ Elaine 帶住佢嘅回憶走入一個新嘅 apartment，將 Elaine’s 東西怖滿每一個角落：試圖將歷史帶入陌生空間嘅「搬屋」片段、試圖暫緩同封存時間而冷藏喺雪櫃入面嘅乾花、試圖將溫暖投射喺浴室冷牆上面嘅舊有感覺、喺玻璃音樂盒裡面壞左嘅回憶 …… 一切細節都關於溫度、時間同過去，但卻永遠同呢個空間扯唔上丁點關係。陌生嘅氣味、太過舒服但永不舒適嘅梳化、要保持整潔而唔可以坐嘅床、永遠都會整齊地留係床頭邊嘅拖鞋 …… 有啲空間即使有幾多內容都好，空間自有嘅定義係點都冇辦法被打破，亦有啲空間永遠不能被營造或塑造。乜野係屋企？移民係「搬家」定係「離家」？我諗對呢個空間黎講， Elaine 係過客，而觀眾只係過客嘅過客。對我而言，同 Elaine 一同處於 Elaine’s 回憶嘅呢十幾分鐘令我覺得好陌生，不相容嘅空間同內容，加上 Elaine 最後個句「下個客人嘅時段就到」，一直提醒我呢個空間並唔屬於任何一個人，而我彷彿見到、窺探到上一手留低、亦係錯置左嘅回憶，而下一手、下一個窺探者亦即將到來。有啲地方同空間就注定係冇得搬。

Tempé Art Space Last Day

一個近排好喜歡嘅 art space ，（除左係因為近我屋企之外，）仲係因為佢大部份嘅展覽都幾啱我口味，都有一種好純粹、簡單、直接嘅感覺。一入去，空間唔大，一眼望哂，一個廁所，兩邊窗，同埋一堆 socket 同電線管。而呢啲咁直接嘅 preset 係之前嘅大部份展覽中都同作品有唔同嘅互動。雖然唔係每個展都有特別嘅感受，但所有都展覽都十分真誠，一目了然。

另外我喜歡呢個地方係因為佢喺香港仔嘅商業大廈，樓上樓下都經常見到有小朋友學畫、學樂器、上興趣班等等，每次黎呢個 space 都覺得好「容易」，好簡單。呢種親切感係呢個空間自帶嘅質感，雖然呢一點未有喺之前嘅展覽到 explore 過，但可能就係呢個空間比到純粹嘅感覺我嘅原因。

唔捨得啊！

導演 Director :
Céline Sciamma

年份 Year :
2021

// Au revoir // — Petite Maman

一個好嘅再見，究竟應該點講？入場前睇到訪問話套戲嘅靈感來自宮崎駿、 Mabel Normand 同許鞍華，睇完亦都即刻 relate 到《千與千尋》。同樣一段喺森林、因為突然離別而展開嘅魔幻旅程，同樣去處理喺離別後、離別前要好好做好嘅事。成段旅程貫穿 Nelly 、 Marison 同 Nelly 三代母女嘅「愛情」，而嘅呢一段關係入面，男人唔需要、亦冇資格參與。旅程亦令 Nelly 可以再一次同離去嘅「愛人」講再見，再思考應該點講最好嘅〝Au revoir〞。

承接 Portrait of a Lady on Fire，導演再次用佢最拿手嘅眼神講述所有關係之間嘅愛同情感，當然作為一套小品，今次冇好 epic 同 poetic 嘅 gazing，但演員每個眼神都十分真摰，都充滿愛啊！為角色設計嘅每個動作同交流亦都十足咁表現到每段關係嘅不同狀態，最深刻就係開頭 Nelly 同 Marison 喺車到嘅小食時間，笑容、表情、食咩、點食，全部都係細心嘅設計同愛嘅表現。最後當然唔少得配樂，上次 Portrait 最尾嘅 Summer 非常強大，今次亦繼續有 Para One 嘅配樂，乘載兩母女道別前最後嘅探索旅程。