2022.06 筆記合集

展覽 Exhibition :
再紡東亞系列二：邊織邊拆的網

作品 Work :
虛無鄉遠

藝術家 Artist :
李繼忠
伊佐治雄悟

地點 Venue :
六廠 CHAT

1936 年，日本關東軍制定農民移民計劃，迫使國民遷到滿洲國。未及十年，日本戰敗，移滿洲者需要再次被迫遷返日本，更要成為次等公民，失去一切身份，留喺國界之間嘅虛無。

作品以 7 段錄像重塑 7 日情感：由農民對自身國土地質失望，憧景他方開始，步入無盡嘅森林，即使需要拋棄女兒、母親，亦都只能向前走。到埗卻發現錢幣不通，亦未能落戶，無處安身。7 段錄像以 7 個頻道展示，一日一日咁係 7 個連續嘅螢幕中播放，引導（迫使）觀眾喺空間中向前走，隨只會向前嘅時間，走到下一日。即使你未好好消化好昨日嘅勞累、離別、痛苦都好，你都必需向前走。每當你走過一日，未處理嘅情感會不斷堆疊，女兒嘅聲音－「お母さん、お母さん」－會不停咁從上一日嘅片段，由背後傳到你腦中，問你：「呢到係邊到？仲要有幾耐路程？」，冇休息同拒絕嘅餘地。移民最終未能落戶，只能喺關口呆坐，佢地突然同時面向鏡頭，向錄像另一方嘅觀眾提問家鄉嘅定義。作品最後以聲效將觀眾拉回旅程的入口，卻又突然喺漆黑之中，喺最後的螢幕作結，將觀眾耍到入口同出口嘅中間點，留佢地喺進退維谷嘅夾縫中。

對李繼忠黎講，佢以一貫方式回歸檔案，繼續揭開歷史中被遺忘嘅情感；對展覽黎講，係一段大國博奕之下嘅離散故事，係喺織與拆之間掉落、無人執拾嘅毛冷碎。呢啲毛冷碎偏偏裝載大量情感，飛散於大敘事之中。