2022.11 筆記合集

展覽 Exhibition :
《南喃》— 王順瑜個展

藝術家 Artist :
王順瑜 WONG Shun Yu

地點 Venue :
言本當代 a.m.space

沒有你想的那麼美好，卻也沒有那麼糟糕

繼上次《我離開家的第三百三十三天》，王順瑜再次描繪異鄉人嘅精神面貌，今次聚焦深漂如何思考「根」同「家」。收獲同去留係所有人共知深漂會有嘅掙扎，《深漂十年，你收穫了什麼？一間房子。》（2022）嘅房子係一束迷糊、抓唔實輪廓嘅花；《你打算什麼時候離開深圳啊？》（2022）祈求有隻能帶佢地進入夢鄉嘅白兔。我幾鍾意王順瑜嘅畫作同畫名中間嘅化學作用，今次文字提出困境，畫面則反映主角心中未能言喻嘅答案。

生活喺只能蜉蝣不定、抓不住根嘅城市，仲可以有咩情感？即使盡力帶笑，一切都反映喺嗰啲被逼至扭曲嘅臉上。呢次嘅作品亦特寫左故事主角們一岩一窟嘅臉部表情，唔只主角，連主角嘅魚都係一臉呆滯。大都會嘅步伐快到令人冇處容身，情感赤裸咁被滯壓喺臉上，佢地嘅臉令我諗起社交媒體上嘅梗圖（memes），只能以荒謬嘅臉面對無以為力嘅世界 — 《殘忍：不止深圳，其實你到任何一個一線城市都是這樣，加班、搞錢、通勤；所以，加油吧。》 — 深圳如是，香港如是，喺香港，我地或會叫呢啲做「隻積咁嘅樣」或者係「年初四咁嘅樣」。

但「《人類的痛苦並不相通》」，除左臉，畫作亦喺植物上搵「樹窿」（王順瑜上次個展中嘅盤栽，同樣紀錄左對親人嘅思念同當中嘅憂傷）。植物喺絹上表現模糊，沒有軀殼，剩下靈體。雖然所有事情都變得不堪，最後嘅白牡丹卻依然散發出微光 —「沒有你想的那麼美好，卻也沒有那麼糟糕」我諗，呢句話無論你係漂定唔漂，喺唔喺一線城市，現在，所有人都只能夠咁講。